Hvað kostar vefsíða í Framer?

Vefsíða í Framer kostar tvennt: vinnuna við að hanna og byggja vefinn og svo áskriftina að Framer sjálfu. Hjá íslenskri vefstofu kostar hönnun og uppsetning einfalds kynningarvefs oftast 500 til 900 þúsund krónur án vsk, fyrirtækjavefur með CMS og fleiri síðugerðum 900 þúsund til 2 milljónir, og stærri vefir með bókunartengingum og mörgum tungumálum 2 til 4 milljónir. Ofan á það kemur Framer-áskriftin, sem fyrir flest íslensk fyrirtæki er Pro-áskriftin á 30 dollara á mánuði, eða rétt um 4 þúsund krónur.

Það er gagnlegt að halda þessum tveimur kostnaðarliðum aðskildum í hausnum. Sá fyrri er einskiptiskostnaður sem fer eftir umfangi og hverjum þú kaupir vinnuna af. Sá síðari er fastur mánaðarlegur kostnaður sem Framer ákveður og er sá sami hvaða stofa sem vinnur vefinn. Hér förum við yfir báða liðina, hvað ræður þeim og hvar peningarnir sparast í raun þegar Framer er valið.

Hvað kostar Framer-áskriftin sjálf?

Framer einfaldaði verðskrána sína í þrjár áskriftarleiðir í lok árs 2025 og þær gilda enn í dag. Öll verð eru miðuð við árlega greiðslu og birt á dollaraverði, þó Framer staðfæri verð eftir löndum svo íslenskir notendur sjá tölur í sinni mynt.

• Basic á 10 dollara á mánuði, um 1.300 krónur. Eitt CMS-safn, 30 síður, 10 GB gagnaflutningur á mánuði. Hentar einstaklingsvefjum og portfolio-síðum.

• Pro á 30 dollara á mánuði, um 4 þúsund krónur. Tíu CMS-söfn, 150 síður, 100 GB gagnaflutningur, staging-umhverfi, ítarleg umferðargreining, hlutverk og aðgangsstýring, áframsendingar á slóðum.

• Scale frá 100 dollurum á mánuði, um 13 þúsund krónur, og hækkar með notkun. Tuttugu CMS-söfn, 300 síður, 200 GB, forgangsþjónusta, A/B-prófanir og öflugra dreifinet með yfir 300 staðsetningum.

Nánast öll fyrirtæki sem við vinnum með hjá Flóru lenda á Pro. Basic dugar ekki fyrir fyrirtækjavef með bloggi eða fréttum, því eitt CMS-safn þýðir að þú getur haft blogg eða þjónustusíður í safni, en ekki bæði. Staging-umhverfið á Pro er líka atriði sem fæstir átta sig á að þeir vilja fyrr en þeir þurfa það. Það gerir mögulegt að prófa breytingar á vefnum áður en þær fara í loftið, og við höfum skrifað sérstaka grein um hvað staging-síða er og af hverju þú sérð stundum tvær útgáfur af vefnum þínum.

Scale kemur til sögunnar þegar umferðin er mikil, til dæmis á ferðaþjónustuvef sem fær tugþúsundir heimsókna á mánuði á háannatíma, eða þegar fyrirtækið vill keyra A/B-prófanir á forsíðunni. Fyrir langflesta íslenska fyrirtækjavefi er Pro rétta stærðin í mörg ár.

Hvað kosta ritstjórasæti og hver þarf þau?

Framer rukkar sérstaklega fyrir hverja manneskju sem hefur breytingaaðgang að vefnum, umfram eigandann. Frá maí 2026 kostar hvert ritstjórasæti (Editor) 20 dollara á mánuði á öllum áskriftarleiðum, og Framer kynnti samhliða ódýrara sæti sem heitir Content Editor á 10 dollara á mánuði. Content Editor getur breytt efni í CMS-inu, bætt við bloggfærslum, uppfært texta beint á síðunni og unnið með þýðingar, en kemst ekki í hönnunina sjálfa.

Fyrir dæmigert íslenskt fyrirtæki þýðir þetta að markaðsfulltrúinn sem sér um blogg og fréttir þarf Content Editor sæti á um 1.300 krónur á mánuði. Framkvæmdastjórinn sem vill geta lagað eitt orð á forsíðunni af og til þarf í raun ekki sæti, því eigandaaðgangurinn dugar einni manneskju. Fyrirtæki með tvo til þrjá sem vinna reglulega í vefnum eru að horfa á 2 til 5 þúsund krónur á mánuði í viðbót við grunnáskriftina.

Eitt atriði sem sparar pening: vottaðir Framer-samstarfsaðilar fá frítt sæti í verkefnum viðskiptavina sinna. Flóra er Framer Partner og því kostar það þig ekkert að við höfum aðgang að vefnum þínum til að sinna viðhaldi og þróun. Ef stofan þín er ekki vottuð þarftu að borga sæti fyrir hana eins og hvern annan starfsmann.

Hvað kostar hönnun og uppsetning hjá vefstofu?

Þetta er stærri liðurinn og sá sem sveiflast mest. Verðbilin hér að neðan eru það sem við sjáum á íslenskum markaði árið 2026, án vsk, og eiga við vefstofur og reynda sjálfstæða hönnuði sem vinna í Framer.

Aðlögun sniðmáts að lógói og litum, með fimm til átta síðum og engri sérhönnun, kostar 250 til 500 þúsund. Þetta er lögmæt vara fyrir nýstofnað fyrirtæki með lítið fjármagn, en vertu viss um að hún sé seld sem aðlögun og ekki sem sérhönnun.

Sérhannaður kynningarvefur með fimm til tíu síðum, einni til tveimur síðugerðum fyrir undirsíður og einföldu CMS fyrir fréttir kostar 500 til 900 þúsund. Hér er raunveruleg hönnunarvinna í gangi: moodboard, stílprufa, uppbygging á síðum og prófanir á síma.

Fyrirtækjavefur með 10 til 25 síðum, þremur til sex síðugerðum, bloggi eða fréttakerfi, þjónustusíðum, sérhönnuðum forsíðuþáttum og fullri CMS-uppsetningu kostar 900 þúsund til 2 milljónir. Þetta er algengasta verkefnastærðin hjá okkur.

Stærri vefur með bókunartengingu, tveimur til fjórum tungumálum, síuvirkni fyrir vörur eða ferðir og tugum síðugerða lendir á 2 til 4 milljónum. Ferðaþjónustuvefir eru oftast í þessum flokki og við höfum farið nánar yfir þá í greininni Hvað kostar vefsíða fyrir ferðaþjónustufyrirtæki?.

Til samanburðar má nefna að þegar hönnunarvinnan er keypt sér, án uppsetningar, kostar hún 400 til 900 þúsund fyrir minni fyrirtækjavef. Sá samanburður er útskýrður í greininni Hvað kostar vefhönnun?. Munurinn á þeirri tölu og heildarverðinu hér að ofan er einmitt það sem Framer breytir.

Af hverju er Framer-vefur ódýrari í heildina?

Hönnuðurinn þarf jafn langan tíma til að hugsa út notendaflæði, teikna síðugerðir og velja letur hvort sem lokaútkoman fer í Framer eða annað kerfi. Sparnaðurinn liggur í því að forritunarskrefið hverfur að mestu.

Í hefðbundnu ferli er vefur teiknaður í Figma, samþykktur, og síðan afhentur forritara sem endurbyggir hann í WordPress, Umbraco eða sérsmíðuðum kóða. Þessi endurbygging tekur oft jafn langan tíma og hönnunin og hún kostar á íslensku tímagjaldi 18 til 28 þúsund krónur á klukkustund. Í Framer byggir hönnuðurinn vefinn beint í tólinu. Skjalið sem þú samþykkir er sama skjal og fer í loftið.

Fyrir fyrirtækjavef af miðlungsstærð lækkar þetta heildarkostnað við hönnun og uppsetningu um 30 til 50 prósent miðað við hefðbundið ferli með aðskilinni forritun. Vefur sem kostar 2,5 til 3 milljónir í Figma og WordPress lendir gjarnan á 1,5 til 2 milljónum í Framer. Verkefnistíminn styttist á sama hátt, frá þremur til fimm mánuðum niður í fjórar til sex vikur hjá okkur.

Það er þó rétt að segja hvenær þessi sparnaður hverfur. Ef vefurinn þarf innskráningarsvæði, flókna netverslun með lagerstýringu eða djúpa samþættingu við bakendakerfi, þá bætist sérforritun aftur við og verðmunurinn á Framer og öðrum kerfum minnkar eða snýst við. Í slíkum verkefnum mælum við oft með öðru kerfi. Hvenær Framer hentar og hvenær ekki er farið yfir í greininni Hvaða vefstofa sérhæfir sig í Framer?.

Hvað kostar að reka Framer-vef á mánuði?

Hér kemur Framer einna best út. Hýsing, öryggisuppfærslur, afritun, SSL-skírteini og dreifinet eru öll innifalin í áskriftinni. Það er engin sérstök hýsingarreikningur, ekkert viðbótasafn sem þarf að uppfæra og engin árleg uppfærsla á kerfinu sem kostar tugi þúsunda. Við höfum farið nánar yfir hýsingarspurninguna í greininni Þarf ég að borga fyrir hýsingu sérstaklega eða er hún innifalin?.

Dæmigerður mánaðarlegur rekstrarkostnaður fyrir íslenskt fyrirtæki með Framer-vef lítur svona út:

• Framer Pro áskrift: um 4 þúsund krónur.

• Eitt Content Editor sæti fyrir markaðsfólk: um 1.300 krónur.

• Lén hjá ISNIC: um 600 krónur á mánuði (7 þúsund á ári).

• Valkvæður viðhalds- eða þróunarsamningur við vefstofu: 30 til 120 þúsund á mánuði eftir umfangi.

Án viðhaldssamnings er reksturinn því í kringum 6 þúsund krónur á mánuði. Til samanburðar kostar rekstur á WordPress-vef með góðri hýsingu, öryggisviðbótum og árlegum uppfærslum oftast 10 til 25 þúsund á mánuði, og þá er ekki talin vinnan við að fylgjast með uppfærslum.

Viðhaldssamningurinn er sá liður sem fólk vill helst sleppa, og fyrir einfaldan kynningarvef er það oft í lagi. Fyrir vef sem á að selja eða bóka er hann hins vegar þar sem verðmætin verða til: nýjar síður fyrir herferðir, endurbætur á flæði út frá gögnum, ný tungumál. Hvað er sanngjarnt í slíkum samningi er efni í sérstaka grein sem er í vinnslu.

Hvað er ekki innifalið í Framer-verði?

Þrjú atriði koma reglulega á óvart í tilboðum og eru ekki hluti af Framer-áskriftinni né oftast af grunnverði vefstofu.

Efni er stærsta atriðið. Textar, ljósmyndir og myndlýsingar eru sjaldan innifalin í verði fyrir hönnun og uppsetningu. Efnisskrif fyrir fyrirtækjavef kosta 150 til 500 þúsund eftir umfangi, ljósmyndun frá 100 þúsund fyrir hálfan dag. Ef tilboð A er 1,2 milljónir og tilboð B er 1,7 milljónir er algengt að munurinn liggi hér.

Samþættingar við önnur kerfi eru annað atriðið. Framer tengist auðveldlega við póstlistakerfi, greiningartól og einföld eyðublöð. Tenging við bókunarkerfi eins og Bókun eða við íslenskar greiðslulausnir krefst oft sérvinnu sem kostar 100 til 400 þúsund eftir kerfi. Spyrðu beint hvað er innifalið í tengingum.

Leyfi fyrir letur eru þriðja atriðið. Framer hefur mikið úrval af fríum leturgerðum í gegnum Google Fonts, en ef vörumerkið þitt notar keypt letur þarf vefleyfi fyrir það, sem kostar frá nokkrum þúsundum upp í tugi þúsunda á ári eftir umferð.

Hvernig les ég tilboð um Framer-vef?

Gott tilboð skiptir verðinu í tvennt eins og þessi grein gerir: einskiptisvinnan og mánaðarlegur rekstur. Ef stofan bakar Framer-áskriftina inn í sitt mánaðarverð skaltu spyrja hvað hún kostar sér og hvort þú getir borgað Framer beint. Það er oftast ódýrara og tryggir að áskriftin sé á þínu nafni, sem skiptir máli ef þú vilt skipta um stofu síðar.

Athugaðu líka hvort tilboðið tilgreinir hvaða Framer-áskrift er gert ráð fyrir. Tilboð sem miðar við Basic fyrir fyrirtækjavef með bloggi og þjónustusíðum er tilboð sem hefur ekki verið hugsað til enda, því þú rekst á eins-safns-þakið innan mánaðar frá útgáfu.

Loks er munurinn á að borga í einu lagi eða í áskrift raunverulegt val hjá sumum stofum. Nokkrar íslenskar stofur bjóða Framer-vefi sem áskrift þar sem hönnun, uppsetning og rekstur eru í einu mánaðargjaldi, oft 60 til 150 þúsund á mánuði með bindingu. Það getur hentað fyrirtæki sem vill ekki stóran reikning í upphafi, en eignarhaldið á vefnum í lok bindingar þarf að vera skýrt. Við höfum borið þessar leiðir saman í greininni Er betra að borga í einu lagi eða í áskrift fyrir vefsíðu?.

Algengar spurningar

Er hægt að gera Framer-vef sjálfur og sleppa vefstofunni?

Já, og fyrir einstaklinga og lítil verkefni er það ágætis leið. Framer er hannað þannig að fólk með tilfinningu fyrir hönnun getur sett upp fallega síðu úr sniðmáti á nokkrum dögum. Kostnaðurinn er þá bara áskriftin. Fyrir fyrirtæki sem á að selja eða bóka í gegnum vefinn skiptir notendaflæðið hins vegar meira máli en útlitið, og þar borgar reynsla sig fljótt.

Þarf ég að borga Framer í dollurum?

Framer staðfærir verð og íslenskir notendur sjá verðið í sinni mynt við kaup. Reikningurinn kemur frá Framer B.V. í Hollandi og virðisaukaskattur reiknast eftir reglum um þjónustukaup milli landa, svo talaðu við bókarann þinn um hvernig það er skráð.

Get ég byrjað á Basic og uppfært síðar?

Já, hægt er að skipta á milli áskriftarleiða hvenær sem er án þess að byggja vefinn upp á nýtt. Fyrir fyrirtækjavef mælum við þó með að byrja beint á Pro. Munurinn er um 32 þúsund krónur á ári og staging-umhverfið og fleiri CMS-söfn sparar þér vandræði frá fyrsta degi.

Hvað kostar að flytja vef úr WordPress í Framer?

Flutningur er í raun nýr vefur, því hönnunin er endurgerð í Framer. Verðið er því á sama bili sem lýst er hér að ofan, 900 þúsund til 2 milljónir fyrir fyrirtækjavef. Efnisflutningur úr gamla kerfinu bætist við, oft 50 til 200 þúsund eftir fjölda færslna, en textinn og myndirnar sjálfar eru þegar til og það sparar mikið.

Á ég Framer-vefinn þegar stofan er búin?

Ef rétt er staðið að því, já. Framer-verkefnið á að vera í vinnusvæði á þínum aðgangi og lénið á þínu nafni. Stofan fær aðgang sem ritstjóri eða samstarfsaðili. Ef stofan býður þér að vera á sínu vinnusvæði til að spara áskrift, þá er það gildra: þú getur ekki skipt um stofu án að biðja hana um að afhenda verkefnið.

Ef þú vilt vita hvað þinn vefur myndi kosta í Framer er stysta leiðin að heyra í okkur hjá Flóru. Við tökum stutt samtal um umfang og markmið og sendum sundurliðað tilboð með föstu verði fyrir vinnuna og skýrri áætlun um mánaðarlegan rekstur.